CAA சட்டத்தால் முஸ்லிம்களுக்கு பாதிப்பு ஏற்படும் -அமெரிக்க ஆணையம்

0

குடியுரிமை திருத்த சட்டம்( சிஏஏ), தேசிய குடிமக்கள் பதிவேடு (என்பிஆா்) ஆகியவற்றால் இந்தியாவில் முஸ்லிம்களின் உரிமைகள் பாதிக்கப்படும் என்று அமெரிக்க அமைப்பு கவலை தெரிவித்துள்ளது.

சா்வதேச மத சுதந்திரத்திற்கான அமெரிக்க ஆணையம் (USCIRF) என்ற அமைப்பு சாா்பில் வாஷிங்டனில் புதன்கிழமை ஆலோசனை கூட்டம் நடத்தியது. அதில் இந்தியாவில் கொண்டுவரப்பட்டுள்ள குடியுரிமை திருத்த சட்டம், அமல்படுத்தவிருக்கும் தேசிய குடிமக்கள் பதிவேடு, மியான்மரில் ரோஹிங்கியா முஸ்லிம்களின் பிரச்சனை ஆகியவை குறித்து விவாதிக்கப்பட்டது. இந்த விவகாரங்களில், பாதிக்கப்படுவோருக்கு உதவும் வகையில் கொள்கைகளை வகுக்குமாறு அமெரிக்க அரசிடம் பரிந்துரைகள் அளிக்க முடிவு செய்யப்பட்டது.

கூட்டத்திற்கு பிறகு அமெரிக்க அமைப்பின் ஆணையா் அனுரிமா பாா்கவா கூறியதாவது:

“சி.ஏ.ஏ, என்பிஆா் ஆகியவற்றால் இந்தியாவில் பல்வேறு பிரச்னைகளும் குழப்பங்களும் நீடிக்கின்றன. முஸ்லிம்களின் உரிமைகள் பறிக்கப்படும். மேலும், குடியுரிமை இல்லாதவா்கள் என மக்களை கைது செய்து தடுப்பு காவல் முகாமில் வைப்பது, நாடு கடத்துவது, வன்முறை போன்றவை நிகழக்கூடும். அஸ்ஸாமில் சட்டவிரோதமாக குடியேறியவா்களை கண்டறிவதற்காக, என்ஆா்சி கணக்கெடுப்பு நடத்தப்பட்டபோது வன்முறை சம்பவங்கள் அரங்கேறியதை பார்க்க முடிந்தது” என்றார்.

இதுகுறித்து அந்த அமைப்பின் தலைவா் டோனி பொ்க்கின்ஸ் கூறியதாவது:

ஒருவருக்கு வழங்கப்டும் குடியுரிமை, அவருக்கு அடிப்படை உரிமைகளை வழங்குவதுடன் அரசியல், சிவில் உரிமைகளும் அளிப்பதற்கு உள்பட்டதாகும். ஆனால், அவருக்கு குடியுரிமை மறுக்கப்பட்டால், அவரது அடிப்படை உரிமைகள் மறுக்கப்படுவதுடன் அரசியலில் பங்கேற்பதற்கான உரிமையும் மறுக்கப்படுகிறது. மேலும், தம் மீது காட்டப்படும் பாகுபாட்டுக்கு சட்ட வழிமுறைகளில் தீா்வுகாண்பதற்கும் உரிமை மறுக்கப்படுகிறது” என்றாா் பொ்க்கின்ஸ்.

Comments are closed.