முஸ்லிம்கள் மீது அவதூறு பரப்பிய அர்னாப் கோஸ்வாமி: மும்பை காவல்துறை வழக்குப்பதிவு

0

நாடு முழுவதும் கொரோனா தொற்றை தடுக்கும் வகையில் ஊரடங்கு அமலில் இருக்கிறது. தற்போது மூன்றாம் கட்ட ஊரடங்கு அமலுக்கு வந்துள்ளது.

இந்த நிலையில் கடந்த மாதம் 14ஆம் தேதி மும்பை பந்த்ரா பகுதியில் ஒரு மசூதி முன்பு ஆயிரக்கணக்கான புலம்பெயர் தொழிலாளர்கள் ஒன்றிணைந்து போராட்டம் நடத்தினர். வாழ்வாதாரம் இன்றி தவிப்பதால் உடனே தங்கள் சொந்த ஊருக்கு அனுப்பி வைக்க வேண்டும் என்று வலியுறுத்தினர்.

இதுதொடர்பாக கடந்த மாதம் 29ஆம் தேதி ரிபப்ளிக் தொலைக்காட்சி பத்திரிகையாளர் அர்னாப் கோஸ்வாமி சர்ச்சைக்குரிய வகையில் பேசியதாக மும்பை போலீசார் தரப்பில் தெரிவிக்கப்பட்டது.

இந்நிலையில் மசூதியின் புகைப்படம் மற்றும் மக்கள் கூட்டத்தை குறிப்பிட்டு அர்னாப் பேசியது மத உணர்வுகளை புண்படுத்தும் வகையில் இருப்பதாக ராஸா எஜூகேஷன் வெல்ஃபேர் சொசைட்டி அமைப்பின் செயலாளர் இர்பான் அபுதாகிர் ஷேக் புகார் அளித்தார்.

அதில், கடந்த ஏப்ரல் 14ஆம் தேதி புலம்பெயர் தொழிலாளர்கள் தங்களை சொந்த ஊருக்கு அனுப்பக் கோரி நடைபெற்ற போராட்டத்திற்கும் மசூதிக்கும் எந்தவித தொடர்பும் இல்லை. எனவே மசூதியை குறிப்பிட்டு நிகழ்ச்சியில் பேசியது குறிப்பிட்ட சமூகத்தினரை புண்படுத்தும் செயல் என்று குறிப்பிட்டிருந்தார்.

இதையடுத்து அர்னாப் கோஸ்வாமி மீது இந்திய தண்டனைச் சட்ட பிரிவுகளின் கீழ் மும்பை தெற்கு பைதோனி போலீசார் வழக்குப்பதிவு செய்தனர்.

முன்னதாக காங்கிரஸ் தலைவர் சோனியா காந்தி மீது அவதூறு பரப்பும் வகையில் பேசியதாக அர்னாப் கோஸ்வாமி மீது பல்வேறு மாநிலங்களில் புகார் அளிக்கப்பட்டது. பின்னர் இவ்வழக்கில் மூன்று வாரங்களுக்கு அர்னாப் மீது நடவடிக்கை எடுக்க உச்ச நீதிமன்றம் தடை விதித்தது. இந்த சம்பவம் தொடர்பாக புதிதாக வழக்குப்பதிவு செய்யவும் தடை விதிக்கப்பட்டது குறிப்பிடத்தக்கது.

 

Comments are closed.